Araia-Asparreneko Umore Antzerkiaren Jaialdia uda honetan itzuliko da 33. edizioarekin eta Arabako 22 herritan eskainiko diren 32 emanaldirekin. Guztira, hamaika konpainiak parte hartuko dute lurraldeko udako arte eszenikoen hitzordu nagusietako batean, eta programazioa Araiatik Arabako hainbat herritara zabalduko da berriro.
Jaialdiaren programa nagusia Araian egingo da abuztuaren 13tik 16ra, lau egunetan banatutako hamar emanaldirekin. Horrekin batera, zirkuitu ibiltariak beste 22 emanaldi eramango ditu Arabako 21 herritara, abuztuaren 3tik irailaren 11ra bitartean.
Jaialdiak bere ohiko formatu bikoitzari eutsiko dio, aretoko ikuskizunak eta kaleko antzerkia eskainiz. Kaleko emanaldi guztiak doakoak izango dira.
Lau antzerki gau Arrazpi Berri kiroldegian
Araiako aretoko programazioak lau ikuskizun izango ditu, guztiak 22:30ean Arrazpi Berri kiroldegian.
Jaialdia abuztuaren 13an hasiko da Adriana Olmedo konpainiaren Sexpir Mal lanarekin. Abuztuaren 14an La Cuerda Teatro & Ttipia Kulturaren Las Reinas del Camping izango da ikusgai.
Abuztuaren 15ean Erre Produkzioaken La Virgen del Rocío se aparece porque se lo ha dicho su psicóloga iritsiko da, eta aretoko programazioa abuztuaren 16an amaituko da Ron Laláren La Desconquista lanarekin.
Doako sei kaleko antzerki proposamen Araian
Araiako kaleak berriro ere agertoki bihurtuko dira jaialdiaren lau egun nagusietan. Abuztuaren 13an Caricatos, La Belle Écolerena, eta Edu Manazasen Meraki eskainiko dira. Azken ikuskizun hori iazko edizioan egitekoa zen, baina euriaren ondorioz bertan behera geratu zen.
Manazasek, gainera, ostiral goizean familientzako zirku tailer bat eskainiko du, eta parte-hartzaileek malabarismoa, oreka eta akrobaziak bezalako diziplinak ezagutzeko aukera izango dute.
Abuztuaren 14an Claudette, Maleta Company & Cie. Balancetoirena, izango da ikusgai; hilaren 15ean Trapu Zaharraren ¡La última y nos vamos!; eta abuztuaren 16an Pikor Teatroren Atsoak dantzan eta Los Barlouren Does lanek itxiko dute kaleko programazioa.
Antzerkia Arabako beste 21 herritara iritsiko da
Abuztuaren 3tik irailaren 11ra, bost ikuskizunek osatutako zirkuituak 22 emanaldi eskainiko ditu lurraldeko beste 21 herritan.
Programazioa Amurrio, Artziniega, Atauri, Berantevilla, Durana, Elciego, Izarra, Bastida, Lantziego, Laudio, Luiaondo, Manzanos, Maeztu, Oion, Okina, Okondo, Larrazubi, Agurain, Eskuernaga, Zaitegi eta Zuhatzu Kuartangora iritsiko da.
Araian ere ikusgai izango diren proposamenei OseteDeliriosen The Return of Delirios gehituko zaie. Ikuskizun hori zirkuitu ibiltarian bakarrik eskainiko da.
Sarrerak abuztuaren 1etik aurrera
Aretoko lau ikuskizunetarako sarrerak eta jaialdi osorako abonua abuztuaren 1ean jarriko dira salgai jaialdiaren webgunearen eta Entradium plataformaren bidez. Abonuak 44 euroko prezioa izango du eta abuztuaren 11ra arte erosi ahal izango da. Banakako sarrera bakoitzak 15 euro balioko du.
Aurrez aurreko salmenta ere egingo da Arrazpi Berri kiroldegian abuztuaren 1ean, 2an, 8an eta 9an, 12:00etatik 14:00etara. Emanaldi bakoitzerako geratzen diren sarrerak ikuskizuna hasi baino ordubete lehenagotik erosi ahal izango dira txarteldegian.
ARGAZKIA: Arabako Foru Aldundia
