Donemiliagako Udalak mozio bat onartu du Arabako Foru Aldundiari eskatuz landa-eremuko Etxez Etxeko Laguntza Zerbitzua behar bezala bermatzeko eta erabiltzaileen eskubideak errespetatzeko.
Donemiliagako Udalak mozio bat onartu du Arabako Foru Aldundiari eskatuz landa-eremuan Etxez Etxeko Laguntza Zerbitzua behar bezala bermatzea, zerbitzua eskatzen duten pertsonek Oinarrizko Gizarte Zerbitzuetako gizarte-langileek antzemandako premiei erantzuteko aukera izan dezaten. Udalak gogorarazi du asteburuetan arreta emateko zailtasun handiak daudela eta, ondorioz, zerbitzua oinarrizko jardueretara mugatzen dela kasu askotan.
Asteburuetan eta kasu berrietan zerbitzu mugatua
EH Bilduk aurkeztutako mozioak azaldu duenez, Oinarrizko Gizarte Zerbitzuek Gizarte Ongizaterako Foru Erakundearen (GOFE) jarraibideak jaso dituzte, eta bertan adierazten da etxez etxeko laguntza emateko langileak aurkitzeko zailtasun nabarmenak daudela, batez ere asteburuetan. Horren ondorioz, gomendatzen da zerbitzua ahal den neurrian jarduera oinarrizkoetara mugatzea, hala nola erabiltzaileak jaikitzeko, garbitzeko eta oheratzeko laguntza eskaintzera.
Bestalde, GOFEren lan-bolumenak eraginda, espediente guztien kudeaketa pertsona bakar batek egiten duenez, baliteke zerbitzu berriak aktibatzeko bi edo hiru hilabeteko atzerapena gertatzea, premiazko kasuak izan ezik.
Zerbitzua jasotzeko atzerapenak
Mozioak adierazi du egoera honek landa-eremuko erabiltzaileek behar adina laguntza jasotzea eragozten duela, zenbait kasutan asteburuetan zerbitzurik jaso ezin dutelako edo hainbat hilabete itxaron behar dutelako arreta jasotzeko. Donemiliagako Osoko Bilkurak nabarmendu du atzerapen hauek eta zerbitzuaren mugaketek zuzenean eragiten dietela erabiltzaileen ongizateari eta autonomia pertsonalari.
Udalaren eskaera Aldundiari
Horregatik guztiagatik, Donemiliagako Udalak Arabako Foru Aldundiari eskatu dio landa-eremuko biztanleen premietara egokitutako Etxez Etxeko Laguntza Zerbitzua bermatzea, eta udal araudia osorik betetzea, bereziki erabiltzaileen helburu, ezaugarri eta eskubideei buruzko 4., 6. eta 9. artikuluetan jasotakoa.
Bastidan ere, mozioa onartuta
Bastidan ere onartu da mozioa.
ARGAZKIA: Txus Díez
