Esne Berriketan izeneko bertso-saioa izango da ostiralean, otsailaren 6an, 19:00etan, Aramaioko Kultur Etxean. Saioa Uxue Alberdik kaleratu berri duen liburuan oinarritzen da, eta ahozko memoria, bizipen pertsonalak eta egunerokoaren ertzak izango ditu ardatz.
Liburuaren oinarrian, emakumeek ahoz kontatutako narrazioak daude: ahots intimoak, bizipen propioak eta eguneroko bizitzatik jasotako pasarteak. Idazleak belarriz jaso, eta idatziz ekarri ditu kontakizun horiek, memoria kolektiboaren mosaiko bat osatuz.
Hitza, ahotsa eta mugimendua oholtzan
Bertso-saioak kontakizun horiek hartuko ditu abiapuntu, eta hitza, ahotsa eta mugimendua uztartuz eramango ditu oholtzara. Helburua da liburuak marrazten duen paisaia kolektiboa modu bizi eta partekatuan adieraztea, ikus-entzuleekin harreman zuzenean.
Saioak bertsolaritza eta sormen eszenikoa uztartzen ditu, ahozkotasunetik sortutako istorioak gaurkotasunera ekarriz eta publikoarekin konpartituz.
ARGAZKIA: Aramaioko Udala
