Gobernu Kontseiluak onartutako akordioak bi erakundeen arteko lankidetza formalizatzen du, euskararen erabilera Araban ikertu, sustatu eta zabaltzeko helburuarekin. Proiektuaren barruan hainbat ikus-entzunezko material sortuko dira, Gasteizen, Gorbeialdean eta Arabako Errioxan egindako elkarrizketetan oinarrituta.
Bideo laburrak eta dokumental luzeago bat ekoitziko dira, euskarak gizarte- eta lurralde-testuinguru ezberdinetan duen erabileraren inguruko testigantzak jasotzeko. Eduki horiek EBAgunearen webgunean argitaratuko dira, eta ataria egokituko da proiektuaren kronologia, elkarrizketak eta bideoak jasotzeko.
Lankidetza instituzionala eta hizkuntza-gobernantza berria
Hitzarmen honek euskararen aldeko erakundeen arteko elkarlana sendotzen du, eta Eusko Jaurlaritzak 2024ko urtarrilean abiarazitako Aroa esparru estrategikoaren baitan kokatzen da. Eredu horrek euskararen erabilera soziala indartzea eta euskal hiztun komunitatea ahalduntzea du xede.
Arabako Foru Aldundiak azpimarratu du akordio honek “etorkizuneko hizkuntza-politika koordinatu eta eraginkorrago baterako urrats sendoa” dela, eta Euskaltzaindiaren ezagutza eta esperientzia “funtsezkoak” izango direla lurraldeko hizkuntza biziberritzeko prozesuan.
ARGAZKIA: Irekia
