Aramaioko Udalak kaleko altzarien aurkako kalte berriak salatu ditu eta gertakarien aurrean bere nazka eta haserrea agertu ditu. Azken erasoan, parkean berriki jarritako eserleku bat aizkoraz apurtu dute. “Nahikoa da! Ezin da onartu!”, adierazi du Udalak zabaldutako oharrean. Udalaren arabera, kaleko altzariak apurtzea larria bada, are larriagoa da herritarrek beren eskuz egindako lanen aurka egitea.
Parkeko eserleku berria, aizkoraz apurtuta
Udalaren oharrean jasotzen denez, parkean jarritako eserleku berria aizkora batekin hondatu dute. Udalak gogorarazi du espazio publikoan egindako kalteek herritar guztiei eragiten dietela eta konponketa-lanek kostu ekonomikoa dutela.
Halaber, Udaletik eskatu dute esprai, errotulagailu edo labanekin esperimentuak egin nahi dituztenek etxean egitea, eta gurasoei dei egin diete umeekin eta gazteekin hitz egin dezaten, besteen lana errespetatzearen garrantziaz.
“Ez dugu uste besteen lana hondatzea denborapasa egokia denik”, nabarmendu dute.
Aurrekariak azken hilabeteetan
Ez da lehen aldia azken hilabeteetan Aramaion antzeko kalteak gertatzen direla. Aurretik ere pintaketak eta bestelako apurketak izan dira udalerriko hainbat gunetan, eta ZUKek horien berri eman du.
Ibarran edukiontzien aurkako sute bat ere izan zen, eta horrek kezka piztu zuen herritarren artean, gertakariak errepikatzen ari direlako.
ARGAZKIA: Aramaioko Udala
