Pasa den igandean, Lezako Mahats Bilketaren Jaian, ikus-entzunezko berri bat estreinatu zen pantaila erraldoi batean: Maite dut maite Arabako Errioxa euskalduna. Ekitaldiak 7.000 lagun bildu zituen eta harrera beroa izan zuen.
Egitasmo honek helburu nagusi bat du: Arabako Errioxako euskaldunen aniztasunari ahotsa ematea eta euskarara hurbildu diren pertsonen bizipen positiboak gizarteratzea.
Euskara, testigantzen bidez
Ikus-entzunezkoan eskualdeko hainbat pertsonaren testigantzak bildu dira, eta euren bidez agerian uzten da nola bizi, sentitu eta partekatzen den euskara Arabako Errioxan. “Etorkizunari begira, mezu indartsua bidali nahi dugu: aniztasuna jasota utzi eta gogoeta kolektiboa piztu”, azaldu dute Arabako Errioxako euskara teknikariek.
Elkarlanetik sortutako lana
Proiektuaren atzean honako hauek daude:
- Arabako Errioxako Kuadrillako Euskara Zerbitzua
- Lander Etxedona sortzailea
- Arabako Foru Aldundia
Elkarlan horretatik sortu den lanak begirada baikorra eta bizia eskaintzen dio eskualdeko errealitate linguistikoari, eta euskara sustatzeko bide berriak proposatzen ditu. Ikus-entzunezkoa dagoeneko ikusgai dago YouTube plataforman.
ARGAZKIA: YouTube
