Arabako Foru Aldundiko Kultura eta Kirol Sailak indartu egin du metal detektagailuen legez kanpoko erabileraren aurkako sentsibilizazio kanpaina, lurraldeko ondare arkeologikoa babesteko helburuarekin. Ekimenak Gabonetako erosketa kanpainarekin bat egingo du, eta haurrei zein familiei zuzendutako dibulgazio liburuxka banatuko da.
Merkataritza guneetan
Jende pilaketa handiagoa izaten den egun hauek aprobetxatuz, kanpaina Vitoria-Gasteizko merkataritza zentro nagusietan egingo da. Bertan banatuko da informazio materiala, metal detektagailuen erabilera desegokiak ondare arkeologikoan eragiten dituen kalte larriei buruz kontzientziatzeko.
Ondarearen aurkako erasoa
Kultura eta Kirol Sailak gogorarazi du metal detektagailuak baimenik gabe erabiltzeak eta horrekin lotutako lur mugimenduek ondare arkeologikoa suntsitzen dutela. Objektuak bilatzeko egindako zuloek ez dute soilik ondasun publikoaren lapurreta eragiten; objektu horien testuinguru arkeologikoa ere suntsitzen dute, haien benetako balio historiko eta zientifikoa galduz.
Jarduera horiek espoliatzea dira eta delitu gisa tipifikatuta daude.
Gazteen eta familien inplikazioa
Kanpainaren bidez, bereziki publiko gaztearen konplizitatea bilatzen da, ondare komunarekiko errespetua eta babesa sustatzeko. Sailak azpimarratu du metal detektagailu bat ezin dela inoiz jostailu edo opari egokitzat hartu gure historiaren kontserbazioarekin konprometituta dagoen gizarte batean.
Kanpainaren egutegia eta ordutegiak
Sentsibilizazio ekimena datozen egunetan egingo da, 18:00etatik 20:30era, honako merkataritza gune hauetan:
- Abenduak 16: Gorbeia merkataritza zentroa
- Abenduak 17: E. Leclerc merkataritza zentroa
- Abenduak 18: Dendaraba merkataritza zentroa
- Abenduak 19: Dendaraba merkataritza zentroa
- Abenduak 20: Boulevard merkataritza zentroa (beheko solairua, C&A dendaren ondoko zutabea)
ARGAZKIA: Arabako Foru Aldundia
