Roberto Ugarte izango da 2025eko Andre Maria Zuriaren jaietako pregoilaria, Gasteizko jai nagusiei hasiera emango dien ekitaldian. Pregoia abuztuaren 2an, larunbatean, 21:30ean irakurriko da Plaza Berrian, eta Ugarteren ia 40 urteko musika-ibilbidea eta Gasteiz hiriari egindako ekarpena aitortuko ditu.
Sonia Díaz de Corcuera, Kultura zinegotziaren hitzetan, “Roberto Gasteizen jaio eta hezi zen, eta gure musika- eta kultura-esparruari egindako ekarpena paregabea da. Berak gidatu zuen Luis Aramburu Udal Musika Eskolaren sorrera, eta hainbat erakundetan izan da buru, bai Euskal Herrian, bai estatuko beste lurraldeetan”.
Gasteizko sustraietatik nazioarteko musika kudeaketara
Roberto Ugarte Alvarado Gasteizen jaio zen eta Jesus Guridi Kontserbatorioan ikasi zuen. Arabako Foru Aldundiaren bekarekin, goi mailako gitarra ikasketak egin zituen Madrilen. Irakasle, zuzendari eta moldatzaile gisa aritu da, eta Decca eta Elkar bezalako zigiluekin grabaketak egin ditu.
1995ean Luis Aramburu Udal Musika Eskolako lehen zuzendari izan zen, eta ikastetxearen egungo egoitza eta proiektua berari zor zaizkio. Gero, Kanariar Uharteetan eta Madrilen aritu zen zuzendaritza postuetan, eta 2020tik Granadako Hiria Orkestran eta Scherzo Fundazioan lan egin zuen.
2024tik aurrera, Euskadiko Orkestrako zuzendari nagusia da berriz ere, Gasteizera itzulita.
ARGAZKIA: Gasteizko Udala
