Aramaiok baliabide gehiago eskatu ditu adinekoek herrian bizitzen eta zaintza jasotzen jarraitu ahal izateko

Aramaio Lagunkoia taldeak adinekoen beharretara egokitutako herri baterantz lanean jarraitzen du. Irailean egindako jarraipen-bileran, bereziki, gai bat jarri zuten mahai gainean: laguntza eta zaintza behar handiagoak dituztenean herritarrek Aramaion bizitzen jarraitu ahal izateko behar diren baliabideak.

Bileran Aramaio Lagunkoia taldeko kideek, herritarrek, Aramaioko Udaleko ordezkariek eta Gizarte Zerbitzuek parte hartu zuten. Azken hilabeteetan egindako jarduerak aztertzeaz gain, herrian antzemandako beharrak eta datozen hilabeteetarako lan-ildoak landu zituzten.

Aldundiari eskaera, biztanleriaren zahartzearen aurrean

Aramaio Lagunkoiak landutako gai nagusietako bat adinekoek beren etxean eta Aramaion ahalik eta luzaroen bizitzen jarraitzeko behar dituzten baliabideak izan dira. Taldearen ustez, etxean bizitzen jarraitzea ezinezkoa denean ere, gertuko aukerak eskaini behar dira, adinekoek beren harremanei, eguneroko bizimoduari eta herriarekiko loturari eutsi ahal izateko.

Horren harira, Aramaio Lagunkoiak idazki bat prestatu du Arabako Foru Aldundiari herritik egindako eskaera babesteko. Dokumentuak Aramaioko biztanleriaren bilakaera eta zahartze-prozesua jasotzen ditu, etorkizunean beharrezkoak izango diren baliabideei eta laguntzei aurrera hartzeko.

Hilean behingo ibilaldi osasungarriak

Orain arte egindako jardueren artean ibilaldi eta irteera osasungarriak nabarmendu dituzte. Hilean behin egiten dira eta normalean 10 eta 15 lagun artean biltzen dituzte. Ahal denean, luzera desberdineko ibilbideak prestatzen dituzte, parte-hartzaile bakoitzaren erritmora eta ahalmenetara egokitzeko.

Zenbait irteeratan eguneko zentroko erabiltzaileek ere parte hartu dute. Horrelakoetan, ibilbideak haien beharretara moldatu dituzte eta jardueraren amaieran elkarrekin egoteko tartea ere antolatu dute.

Larrialdietarako taldea Aramaioko auzoetan

Bileran herrian sortutako beste ekimen batzuk ere aztertu zituzten. Horien artean dago larrialdietarako taldea, Aramaion antzemandako beharretatik eta zenbait auzotan izandako suteak bezalako esperientzietatik sortua. Hainbat arlotako ezagutzak dituzten herritarrek osatzen dute taldea, eta prestakuntza-saioak egiten ari dira auzoz auzo, larrialdiren bat gertatzen denean nola jokatu azaltzeko.

Saioetan mahukak eta su-itzalgailuak erabiltzea, ur-guneak non dauden jakitea eta larrialdi-zerbitzuak iritsi arte baliagarriak izan daitezkeen oinarrizko ezagutzak lantzen dituzte.

Farmazia Lagunkoia eta Mugiment, datozen urratsen artean

Aramaio Lagunkoiak Farmazia Lagunkoia ekimenean ere aurrera egin nahi du. Beste udalerri batzuetako esperientziak ezagutzea aurreikusi dute, tartean Alegría-Dulantzikoa, Aramaioko errealitatera zer neurri egokitu daitezkeen aztertzeko.

Horrez gain, Mugiment ekimena martxan jartzea aurreikusten da. Herritarrei jarduera fisikoa sustatzeko baliabide eta jarduerekin harremanetan jartzen lagunduko dien orientazio-figura bat izatea da asmoa.

ARGAZKIA: Euskadi Lagunkoia