EAJ-PNVk Trebiñuren Arabarako integrazioarekin duen konpromisoa berretsi du astearte honetan, Trebiñuko Integraziorako Mahaiarekin Gasteizen egin duen bileraren ondoren. Topaketan, bi aldeek diagnostikoak partekatu, aurrera egiteko aukerak aztertu eta helburu komun baten inguruko lankidetza indartu dute: Trebiñuko herritarren borondatea entzun eta errespetatua izan dadila.
Bileran parte hartu dute Jone Berriozabal Araba Buru Batzarreko presidenteak eta Anartz Gorrotxategi lurralde batzorde jeltzaleko idazkariak, Mahaiak azken asteetan iragarritako bilera-sortaren barruan.
Trebiñuko herritarren borondatea ardatz
EAJ-PNVk azaldu du bat egiten duela plataformak planteatutako eskaera nagusiekin, hau da, Trebiñuko herritarrek euren lotura instituzionala askatasunez erabaki ahal izatearekin. Alderdiak gogorarazi du Trebiñuko enklabeko bi udalerrietan duen ordezkaritza historikoki integrazioaren alde agertu dela, eta jarrera hori hitzez ez ezik ekintzez ere erakutsi duela.
Jeltzaleen ustez, beharrezkoa da Trebiñuko herritarren gehiengoaren borondatea aintzat hartuko duten konponbideetan aurrera egitea, gaur egun oraindik ere irauten duen “egoera anomalo eta anakroniko” hori gainditzeko.
Eztabaida politikoa eta instituzionala berriz irekitzea
Alderdiak defendatu du berriro ireki behar dela Trebiñuren etorkizun administratibo eta instituzionalari buruzko eztabaida politiko eta instituzionala, aldarrikapen historiko horri behin betiko erantzuna emateko.
Ildo horretan, EAJ-PNVk adierazi du Gorte Nagusietan erreklamazio horri bizirik eusteko konpromisoa hartzen duela, eta elkarrizketa instituzionalaren, herritarren borondate demokratikoarekiko errespetuaren eta akordio politikoen aldeko jarrera mantenduko duela.
Integraziorako Mahaiaren lana eskertu du
Araba Buru Batzarrak, gainera, Trebiñuko Integraziorako Mahaiak egindako lana eskertu du, eta trebiñarren alde egindako defentsa etengabea nabarmendu du. Testuinguru horretan, gogorarazi du Trebiñu Egunaren azken edizioak izan zuen harrera ona, eta bertan EAJ-PNVk “maila goreneko ordezkaritzarekin” parte hartu zuela.
Trebiñuko Integraziorako Mahaia 2025eko ekainean sortu zenetik, EAJ-PNV organo horretako kide da, eta bileraren ostean berriz adierazi du Trebiñuko bi udalerrietako bizilagunen bidezko nahiei erantzun zuzena eta eraginkorra emango dieten akordioak bilatzeko prest dagoela.
ARGAZKIA: EAJ-PNV
También te puede interesar
- Los Laboratorios del Gusto acercarán más de 20 productos de Álava y Trebiñu a las Juntas Generales
- Alarma roja por calor en Araba a partir de este mediodía
- La Diputación expulsa a Sarrea de Bernedo y de todos los udalekus de Araba durante tres años
- La Diputación expulsa a Sarrea de Bernedo y de todos los udalekus de Araba durante tres años
