Laudioko Udalak Merkataritza, Ostalaritza eta Zerbitzu-enpresetarako Euskara Planaren (MOZEP) 15. edizioa jarri du martxan. Gaur egun 110 establezimenduk parte hartzen dute egitasmoan, eta etapa berriak kudeaketa-taldearen aldaketa, material berriak eta herriko negozio gehiagotara iristeko ahalegina ekarriko ditu.
MOZEP 2012-2013 ikasturtean sortu zen, Laudioko merkataritza, ostalaritza eta zerbitzuetako establezimenduetan euskararen erabilera handitzeko. Udalak laguntza eta baliabide praktikoak eskaintzen dizkie parte-hartzaileei, negozio bakoitzaren ezaugarrien eta konpromisoaren arabera. Parte-hartzea borondatezkoa da eta establezimendu berriak edozein unetan batu daitezke. Une honetan 110 establezimendu dira MOZEPeko partaide edo onuradun, eta euskararen erabilerarekin lotutako hiru konpromiso-maila dituzte aukeran: oinarrizkoa, ertaina eta gorena.
Ainize Gastaka Laudioko alkateak azaldu duenez, merkataritza eta ostalaritza herritarren eguneroko harremanen parte dira, eta Udalak eremu horietan ere euskaraz aritzeko aukerak handitu nahi ditu.
Hori-Horik kudeatuko du MOZEP datozen hiru urteetan
15. edizioarekin batera, MOZEP kudeatuko duen enpresa aldatu da. Datozen hiru urteetan Hori-Hori aholkularitza-enpresa arduratuko da zerbitzuaz, Laudioko Udalarekin elkarlanean. Etapa berriko helburuetako bat dagoeneko programan dauden establezimenduekin lanean jarraitzea izango da, baina baita merkataritza, ostalaritza eta zerbitzuetako negozio gehiago MOZEPera erakartzea ere.
Horretarako, establezimenduekin aurrez aurreko harremana indartuko da, negozio bakoitzaren beharrak ezagutzeko eta eguneroko jardueran erabil daitezkeen baliabideak eskaintzeko. Nagore Gomara Euskara zinegotziaren arabera, establezimendu bakoitzaren egoera eta erritmoa kontuan hartuko dira. Aldi berean, MOZEPen parte ez diren negozioengana iristeko lana egingo da.
Material eta irudi berriak establezimenduetan
Edizio berriko aldaketarik ikusgarrienetako bat MOZEPen materialetan eta irudian izango da. Establezimendu parte-hartzaileak identifikatzeko elementuak eta paisaia linguistikoarekin lotutako euskarriak berrituko dira.
Udalaren arabera, helburua euskararen presentzia modu praktiko eta erabilgarrian handitzea da. Berritasunen artean, Laudioko taberna eta jatetxeetarako mahai-gaineko berriak prestatu dira.
ARGAZKIA: zuin.net
📲 Recibe las noticias de Álava cada día en tu móvil
