Andre Maria Zuriaren Pilota Txapelketa 2025ean ere izango da Gasteizko jaietako hitzordu nagusietako bat. Zortzi bikotek hartuko dute parte lehiaketan, eta Ogeta pilotalekua izango da berriro ere esku pilotaren epizentroa, abuztuaren 5etik 8ra bitartean. Lehen aldiz, bi mailatan banatuko da txapelketa: A seriea eta B seriea. Finalerdiak astearte eta asteazken jokatuko dira, eta finalak abuztuaren 8an izango dira, ostirala, 21:15ean.
2026ra arte Gasteizen egingo diren pilota profesionaleko bost jaialdien artean lehena izango da aurtengo edizioa, Udalaren laguntzarekin antolatuta. Hala jakinarazi dute astearte honetan Villa Suso jauregian egindako prentsaurrekoan, zeinean parte hartu baitute Ana Lopez de Uralde kirol zinegotziak, Baiko eta Aspe enpresetako ordezkariek, Caixabankeko arduradunek eta pilotari parte-hartzaileek.
“Beste urte batez, Ogetak dardara egingo du esku pilotako mailarik onenarekin, kirol honetako figura nagusiak batuta”, adierazi du Lopez de Uraldek, ikusleak pilotalekura gerturatzeko gonbita eginez: “ikuskizuna eta grina ziurtatuta daude”.
Lehiaketaren egutegia eta bikote parte-hartzaileak
Abuztuaren 5a (asteartea)
17:45: B seriea: Zubizarreta III – Eskiroz vs Alberdi II – Aranguren
Ondoren: A seriea: Artola – Albisu vs Larrazabal – Mariezkurrena II
Abuztuaren 6a (asteazkena)
17:30: B seriea: Dario – Eskuza vs Murua – Tolosa
Ondoren: A seriea: Altuna III – Rezusta vs Zabala – Zabaleta
Abuztuaren 8a (ostirala)
21:15: A eta B serieetako finalak
Ogetako jaialdia pilotazaleentzako hitzordu garrantzitsua bihurtu da azken urteetan, eta 2025eko edizio honek ere ikusmin handia sortu du. Esku pilotaren goi-mailako ikuskizuna, kirolaren festa eta herriaren ospakizuna uztartzen dituen hitzordu berezia izango da.
ARGAZKIA: Vitoria-Gasteizko Udala
