Amurriok Burutik kenduko dizugu Tour ekimena hartuko du datozen egunetan, Arabako Foru Aldundiak antolatutako topaketa informatibo eta ludikoaren bidez, etxebizitza eskuratzeko dauden foru laguntzen inguruko informazioa herritarrengana hurbiltzeko.
Ekimenak kaleko formatua izango du, eta abenduaren 22tik 29ra bitartean garatuko da Juan de Urrutia plazan.
Etxebizitza, arabarren kezka nagusietako bat
Etxebizitza eskuratzea arabarren kezka nagusietako bat dela erakusten dute Arabako Lurralde Historikoko Barometro Soziologikoaren apirileko datuek. Testuinguru horretan, Arabako Foru Aldundiak hainbat laguntza eta programa jarri ditu martxan lurraldean bizi diren pertsonei etxebizitza eskuratzen laguntzeko, landa-eremuari arreta berezia eskainiz.
Laguntza horien berri emateko asmoz, Aldundiak Burutik kenduko dizugu Tour abiatu du, Arabako bost udalerritan, tartean Amurrion.
Kuboen erakusketa Juan de Urrutia plazan
Ekimenaren baitan, abenduaren 22tik 29ra bitartean, kuboen erakusketa bat jarriko da Juan de Urrutia plazan, etxebizitzarako foru laguntzen irudikapen bisuala eskainiz.
Herritarrek bertan izango dute aukera informazioa zuzenean jasotzeko, zalantzak argitzeko eta Arabako Foru Aldundiak etxebizitza eskuratzeko eskaintzen dituen laguntzen inguruko xehetasunak ezagutzeko.
DJ emanaldia abenduaren 26an
Gainera, abenduaren 26an, ekimena DJ baten emanaldiarekin dinamizatuko da, 12:00etatik 15:00etara, Juan de Urrutia plazan, giro atsegin eta parte-hartzailea sortzeko helburuarekin.
Etxebizitzarako foru laguntzak, xehetasunez
Udalak eta Arabako Foru Aldundiak etxebizitzaren gaiarekin kezkatuta dauden pertsona guztiak gonbidatzen dituzte ekimenera hurbiltzera, honako laguntza hauei buruzko informazioa jasotzeko:
- Erosteko abalak: 36 urtetik beherakoentzat, etxebizitza bat erosi nahi dutenentzat.
- Alokairurako bermeak: Landa-ingurunean etxebizitza bat izan eta alokatu nahi dutenentzat.
- Birgaitzeko dirulaguntzak: Landa-gune txikietan etxebizitza duten eta birgaitu behar duten pertsonentzat.
- Araba (n) Bizi Bedi: Alokairu sozial edo babestuaren eskaintza zabaltzera bideratutako programa.
FOTOGRAFÍA: aiaraldea.org
