Euskarazko sormenak hartuko du protagonismoa Araban Euskararen Egunaren harira

Arabako Foru Aldundiak hamar bat jarduera antolatu ditu, literaturaren, musikaren, kirolaren, lan munduaren eta familien aisialdiaren bidez euskararen erabilera sustatzeko
Euskararen Eguna 2026: Euskaraz sortu, euskaraz bizi lelopeko kartela

Euskararen Egunaren 2026ko kartela. Foto: Diputación Foral de Álava

Añadir ZUK en Google
avatar

ZUK.eus

Medio digital independiente de los pueblos y cuadrillas de Álava.
Añadir ZUK en Google

16 de noviembre de 2026 a las 16:36

Abenduaren 3an ospatuko den Euskararen Nazioarteko Egunaren harira, Arabako Foru Aldundiak hamar bat ekimen antolatu ditu lurraldeko hainbat erakunde eta eragilerekin elkarlanean. Euskaraz sortu, euskaraz BIZI! lelopean, urrian hasi eta abendura arte luzatuko den egitarauak euskarazko sormena eta hizkuntzaren erabilera sustatu nahi ditu, adin guztietako herritarrei zuzendutako jardueren bidez.

 

Literaturak, musikak, kirolak, unibertsitateak, lan munduak eta familien aisialdiak izango dute lekua egitarauan, Gasteizen zein Arabako hainbat eskualdetan.

Iñaki Gurtubai Berdintasun, Euskara eta Gobernantzako foru diputatuak nabarmendu du Euskararen Eguna aukera egokia dela hizkuntzaren eguneroko erabileraren garrantzia gogorarazteko.

 

Kantari Arabako eskualdeetara iritsi da

Aurtengo egitarauaren lehen ekimenetako bat Kantari Araban izan da. Urte luzez Gasteizen egin den egitasmoa Arabako beste eskualde batzuetara zabaldu da aurten, 7 eta 11 urte bitarteko haurrei zuzendutako hiru emanaldiren bidez. Lehenengo saioa urriaren 24an egin zuten Kanpezun, Arabako Mendialdeko eta Trebiñuko haurren parte-hartzearekin; bigarrena azaroaren 7an, Langraiz Okan, eta hirugarrena azaroaren 14an, Oionen, Arabako Errioxako haurrekin.

 

Musika eta dantza uztartzen dituen egitasmoak euskarazko abestiak interpretatzeko eta koreografiak prestatzeko aukera eskaintzen die haurrei, lehiarik gabeko jarduera batean, familiek ere parte hartzen dutela.

 

Lan munduan euskararen erabilera sustatzeko ekimenen artean, berriz, Lazarraga sarien bederatzigarren edizioa izan da. Azaroaren 12an Gasteizko Artium Museoan egindako ekitaldian, Arabako Foru Aldundiak eta Bai Euskarari Elkarteak bost aitortza banatu zituzten, Araba eta Trebiñuko arlo sozioekonomikoan euskararen erabilera bultzatzeko egindako lana saritzeko.

 

Euskara kirolean eta familien aisialdian

Azaroaren 19an, Gasteizko Europa Jauregiak Marka eta Erronka Kirolean topaketa hartuko du. Aurtengo jardunaldiaren ardatza eskola kirolak haur eta gazteen hizkuntza ohituren garapenean duen garrantzia izango da.

Kirol arloko profesionalek, entrenatzaileek, teknikariek eta klubetako zein federazioetako ordezkariek entrenamenduetan, lehiaketetan eta kirolarien arteko harremanetan euskararen erabilera handitzeko aukerak aztertuko dituzte.

 

Bestalde, Gure Zirkua Gasteizera itzuliko da azaroaren 20tik abenduaren 12ra bitartean. Iker Galartzak 2017an sortutako euskarazko zirku ibiltariak 15 emanaldi eskainiko ditu Musikaren Ibilbidean, akrobaziak, umorea eta musika uztartuz. Sarrerak www.gurezirkua.eus webgunean eskura daitezke.

 

Lazarragaren literaturatik rapera

Euskal literaturak ere protagonismo berezia izango du azaroko azken astean. Azaroaren 24an, Gidor Bilbaok Lazarraga, XVI. mendeko euskal sortzailea, XXI. mendean irakurri eta gozatzeko hitzaldia eskainiko du, Joan Perez Lazarragaren figura eta haren literatura ondarea ezagutarazteko.

 

Hurrengo egunean, azaroaren 25ean, Euskal Herriko Unibertsitateko Gasteizko campusak Etxepare Rap ikuskizuna hartuko du. Imanol Epeldek sustatutako proposamenak euskal literaturako hainbat egileren testuak berreskuratzen ditu, raparen bidez belaunaldi berriei hurbiltzeko.

 

Azaroaren 30ean, berriz, EHUko Letren Fakultatean Euskararen Biziberritzea Araban (EBA) egitasmoa aurkeztuko dute. Arabako Foru Aldundiaren eta Euskaltzaindiaren arteko elkarlanaren emaitza da proiektua, eta azken sei hamarkadetan euskarak Araban izan duen bilakaera dokumentatzen du, lekukotasunen, material historikoen eta datu soziolinguistikoen bidez.

 

Azkenik, abenduaren 3an, Euskararen Nazioarteko Egunean, Foru Aldundiak Gasteizen eta Eusko Jaurlaritzak antolatutako ekitaldi instituzionaletan parte hartuko du, eta Euskaraz sortu, euskaraz BIZI! lelopeko komunikazio ekimena ere egingo du.

 

Euskararen Egunaren harira antolatutako hurrengo jarduerak

Data Lekua Jarduera
Azaroak 19 Gasteiz Marka eta Erronka Kirolean
Azaroak 20 – abenduak 12 Gasteiz Gure Zirkua
Azaroak 24 Zehaztu gabe Gidor Bilbaoren Lazarragari buruzko hitzaldia
Azaroak 25 EHUko Gasteizko campusa Etxepare Rap
Azaroak 30 EHUko Letren Fakultatea Euskararen Biziberritzea Araban (EBA)
Abenduak 3 Gasteiz Euskararen Nazioarteko Eguneko ospakizunak

📲 Recibe las noticias de Álava cada día en tu móvil

avatar

ZUK.eus

Medio digital independiente de los pueblos y cuadrillas de Álava.

16 de noviembre de 2026 a las 16:36