Gorka Hierro eskultorea 2027an Murgian arte-galeria bat irekitzeko lanean ari da. Bere eskulturak erakusteko ez ezik, inguruko beste artista batzuei lekua egiteko gune bat sortu nahi du. Proiektuaren oinarrian sorkuntza artistikoa ulertzeko modu jakin bat dago: ofizioaren ezagutza, esperientzia eta eskuz egindako lana azken emaitza bezain garrantzitsuak direla uste du Hierrok.
Eskultoreak ZUKi azaldu dionez, etorkizuneko galerian eskultura eta bestelako arte-adierazpenak bildu nahi ditu, inguruko sortzaileei arreta berezia eskainiz. Haien lanak erakusteko aukera ematea eta Murgiako zein Gorbeialdeko kultur jarduera aberastea dira egitasmoaren helburu nagusiak.
Ekimena prestaketa-fasean dago oraindik, baina artista dagoeneko hasi da ezagutarazten. Horretarako baliatzen ari da Gasteizko El Pilar gizarte-etxean azaroaren 7tik 29ra ikusgai dagoen Eskulturak espazioak eraldatzeko erakusketa. Bertan, bere eskultura-lanen aukeraketa bat aurkezten du, datorren urtean martxan jarri nahi duen galeriaren proiektuarekin batera.
Lan artistikoarekiko errespetua, esperientzia eta teknikaren ezagutza dira Hierrok bere proposamenaren oinarrian jarri dituen balioak. Galerian erakutsiko diren piezen kalitatea ez ezik, egileen ibilbidea eta beren ofizioa hobetzen emandako urteak ere aintzat hartzea nahi du.
Tresna elektrikorik ez
Ikuspegi horrek lotura estua du bere lan egiteko moduarekin. Gorka Hierrok erabat eskuz lantzen du egurra, tresna elektrikorik erabili gabe. Gubia du lanabes nagusi, eta haren bidez ematen die forma eskulturei, pazientzia, zehaztasuna eta materialarekin harreman zuzena eskatzen dituen prozesu batean.
Makinek eskaintzen duten abiaduraren aurrean, eskultoreak lan egiteko modu tradizionala aukeratu du, ebaki bakoitza eskuz eginez. Gubiak egurraren gainazalean aurrera egin ahala, erliebeak eta formak sortzen dira, pixkanaka obraren azken itxura osatu arte.
Bere sorkuntza-lana eskultura abstraktuan eta garaikidean oinarritzen da batez ere, nahiz eta lehenago figurazioa ere landu zuen. Pieza bakoitzean egurraren berezko ezaugarriak aprobetxatzen saiatzen da, bereziki zainak eta testurak, lerroen, bolumenen eta espazio hutsen arteko konposizioak sortzeko. Horrela, materialak berak protagonismo handia hartzen du bere obretan. Irregulartasunak, kolore-aldaketak eta tailatze-prozesuak utzitako arrastoak sorkuntzaren parte bihurtzen dira, ikusmenaren zein ukimenaren bidez hauteman daitezkeen sentsazioak eragiteko asmoz.
Basauritik Gorbeialdera
Hierroren eta egurraren arteko harremana haurtzaroan hasi zen. 1976ko martxoaren 27an jaioa, gogoan du aitarekin, lanbidez arotza baitzen, Basauri eta Etxebarriko hainbat saltokitara joaten zela egurrezko oholak erostera. Bidaia haiek eta egur mota desberdinekin izandako lehen harremanak materialarekiko zaletasuna piztu zioten, eta zaletasun horrek bere ibilbide profesionala markatu du. Denborarekin, arotzeria eta ebanisteria ikastea erabaki zuen. Prestakuntza espezializatua jaso zuen eta bi urtez praktikak egin zituen aroztegi batean. Ondoren, sukaldeko altzarigintzari buruzko ikasketekin osatu zuen bere prestakuntza, eta aldi batez industria-sektorean aritu zen lanean.
Bere ibilbide profesionalak beste norabide batzuk hartu bazituen ere, egurrarekiko interesa ez zitzaion inoiz desagertu. 2017an erabaki zuen berriro egur-tailara hurbiltzea, eta Arte eta Lanbide Eskolan hiru urteko ikastaro espezializatu batean izena eman zuen. Prestakuntza horri esker, teknika tradizionaletan sakondu eta gerora eskulturara eramango zuen trebetasuna garatu zuen.
Hurrengo urteetan aroztegietan lanean jarraitu zuen, eta, aldi berean, bere sormen-interesa eskulturarantz bideratzen hasi zen. Hasieran pieza figuratiboak egin zituen, baina pixkanaka forma abstraktuekin esperimentatzen hasi zen, egurraren adierazpen-aukerak modu askeagoan aztertzeko.
Bilakaera horretan, materialaren jatorriak ere gero eta garrantzi handiagoa hartu zuen. Hierrok berreskuratutako egurra edo modu jasangarrian kudeatutako basoetatik datorrena erabiltzen du, eta akaberetarako produktu ekologikoak aukeratzen ditu. Horrela, sorkuntza-prozesuan egurraren jatorri naturala eta berezko ezaugarriak errespetatu nahi ditu. Eskultorearentzat, egurra lantzea ideia bat garatzea da, baina baita ideia hori tailatze-prozesuan zehar aldatzen uztea ere. Azken forma ez dago hasierako asmoaren mende soilik; egur zati bakoitzak eskaintzen dituen aukerek ere eragina dute emaitzan.
Zainek lerro baten norabidea iradoki dezakete, irregulartasun bat konposizioaren parte bihur daiteke eta hutsune batek inguruko bolumenaren adinako garrantzia har dezake. Materialaren eta eskuzko lanaren arteko elkarrizketa horretatik sortzen dira bere eskulturak.
Ofizioa ulertzeko modu hori izango da Murgian ireki nahi duen galeriaren oinarrietako bat. Hierrok hainbat diziplinatan lan egiten duten artistei ahotsa eman nahi die, urteetan zehar beren teknika garatu duten sortzaileei beren lanak erakusteko aukera eskainiz.
Etorkizuneko galerian bere obrak eta beste egile batzuenak bilduko dira, tartean lankidetzan aritzen den Eskuahaldunak elkarteko eskultoreen piezak. Asmoa da sorkuntza-modu desberdinak espazio berean elkartzea, eskulturatik hasi eta pinturara edo bestelako arte-adierazpenetara, lanaren kalitatea eta artista bakoitzaren nortasuna ardatz hartuta.
Aurreikuspenen arabera, galeriak 2027an irekiko ditu ateak, prestaketa-lanak amaitutakoan. Bien bitartean, egungo erakusketak aukera ematen du Hierroren lana bertatik bertara ezagutzeko eta etorkizuneko galeriaren filosofia ulertzeko. Eskulturak espazioak eraldatzeko izenburupean, artistak egurrezko eskultura garaikideak aurkezten ditu, naturaren, materialaren eta espazioaren arteko harremana aztertuz.
Erakusketa azaroaren 29ra arte bisitatu ahal izango da, 08:30etik 21:30era, Gasteizko El Pilar gizarte-etxean. Bere eskulturak erakusteaz gain, Murgian bultzatu nahi duen arte-gunearen lehen aurkezpen publikoa ere bada.
📲 Recibe las noticias de Álava cada día en tu móvil
